اکرام الحق کا نعتیہ کلام

 

*** نعت مبارک ﷺ ***

بصیرت میں فراست میں جہاں کی ہر صناعت میں 

کہیں کوئی بھی آقاﷺ  سا نہیں دیکھا مہارت میں

غلامی   کے   تقاضوں   کو   نبھانا  ہے حقیقت میں

کہ شر مندہ  نہیں  ہونا  ہے  آقاﷺ  کی عدالت میں

کہیں کوئی  صداقت  میں  کہیں  کوئی امانت میں

مرے سرکارﷺ سا دیکھا  نہیں  کوئی ریاضت میں

جہاں  میں  ختم  آقاﷺ  پر  ہوئی  لوگو نبوت  ہے

خدا  کے  آخری  پیکر  ہیں   آقاﷺ  ہی رسالت میں

خدا  کو  یاد  کرنا  بھی  تو  آقاﷺ  کی  عنایت ہے

ملن  رب   سے  کرایا  ہے   آقاﷺ   کی اطاعت میں

قیادت   کا    سفر   معراج   سے    تصدیق  پاتا  ہے

کھڑے تھے انبیاء سارے ہی آقاﷺ  کی امامت میں

یہی  ہے  التجا  آقاﷺ   یہی  حق   کی  سعادت ہو

مدینے  میں  ہی  آئے  موت  گر   میری  عبادت میں

*** ایم اکرام الحق ***

*** نعت پاکﷺ ***

مدینے   کی   بستی  کے   دیدار  سے

گرے  اشک   الفت   کے   رخسار  سے

ملا    فیض     ایسا    ہے  دربار  سے

نہیں  ڈر  ہے  کوئی  بھی  اغیار  سے

غلامی    فقط    نہ    ہو   گفتار  سے

یہ  ہوتی  ہو   ظاہر  بھی  کردار  سے

ہے  مجھ  پر  کرم  کی  عطا  ہو گئی

درودوں    سلاموں   کے   اذکار  سے

مدینے    میں   پھیلا   کرم  ہی  کرم

ہویدا   ہے    رحمت    کے   انوار  سے

نبوت   کا   دنیا   میں   سب   سلسلہ

ہوا    ختم    ہے    شاہ  ابرارﷺ  سے

امیدیں ہیں بخشش کی جو قبر میں

لگی مجھ کو  رحمت کی بھرمار سے

رضا  ہم   پہ   آقاﷺ  کی  لازم  ہوئی

خدا  کی   محبت   ہے  دلدارﷺ  سے

بلا لیں مجھے  بھی  مدینے  میں  اب

یہی  التجا  حق   ہے   سرکارﷺ  سے

*** ایم اکرام الحق ***

*** نعت مبارکﷺ ***

ہم  نے  آقاﷺ   سے  محبت   کا  ہے  زینہ پایا

سارے  آقاﷺ   کے   غلاموں   کو    نگینہ پایا

جب سے  نبضوں  میں   سمایا  ہے  مدینہ پایا

ہم    نے    کونین   کا    سارا    ہے  خزینہ پایا

زندگی   آپ ﷺ   کے   فرمان   پہ   جینی  ہے 

ہم  نے  آقاﷺ   سے  ہے  جیون  کا  قرینہ پایا

جب  دعاؤں  سے سفر  کی  ہے  چلایا  اس کو

ہم  نے طوفاں میں  بھی  محفوظ  سفینہ پایا

جس  نے  آقاﷺ کے  فرامین  سے  گمراہی کی

اس  کو   ہر  دوڑ   میں   دنیا   کی  کمینہ پایا

کاش آقاﷺ کو بھی  بھائے کوئی کاوش میری

نعت سرکارﷺ  میں  شب  بھر  کا  شبینہ پایا

سب یہ سرکارﷺ کی رحمت کا وسیلہ ہے حق

مہرباں   خود   پہ   جو   ہر   ایک   مہینہ پایا

*** ایم اکرام الحق ***

*** “پھر سے رمضاں مل گیا” ***

نور  رحمت  کا  ہے  ساماں  مل  گیا

زندگی میں پھر سے رمضاں مل گیا

پھر فروزاں ہم  کو رمضاں  مل  گیا

مہرباں  سا  ہم  کو  مہماں  مل  گیا

ماہ   رمضاں     ماہ   تاباں  مل  گیا

درد  دنیا   کا   ہے    درماں  مل  گیا

سب  خدا  کا  ہے  کرم ،  توفیق  دی

ماہ  برہاں     ماہ   فرقاں    مل  گیا

تاز گی   ایماں   کی   ممکن  ہو گئی

پھر سے ایماں کا ہے ساماں  مل  گیا

سب یہ رمضاں کی ہے برکت  ہوگئی

جب  ہدایت   کو  ہے  قرآں  مل  گیا

آ گہی   کا   ماہ  رمضاں   کے  سبب

ہم کو رستہ سب سے آساں  مل  گیا

اب نہ ہم کو اور  کچھ  بھی  چاہیے

ہم کو رمضاں سا ہے جاناں  مل  گیا

ہو  گیا   حق   ولولہ  تازہ   ہے   پھر

سلسلہ     تجدید      ایماں  مل  گیا

*** ایم اکرام الحق ***

*** نعت پاکﷺ ***

ہر حقیقت  میں  سچ  بیانی  کی

آپﷺ رحمت  ہیں  زندگانی  کی

اس کی قسمت پہ  رشک  آتا  ہے

جس نے  آقاﷺ  کی میزبانی کی

سب  سے  بالا   مثال   رکھی  ہے

میرے  آقاﷺ  نے  حکمرانی  کی

میرے آقاﷺ  نے  اپنے  مولا  سے

عہد  الفت    کی     پاسبانی  کی

میرے آقاﷺ کی شان رحمت  ہے

سارے عالم  میں  ضوفشانی  کی

میرے آقاﷺ نے اپنی  رحمت سے

ہر   خبر   دی   ہے   شادمانی  کی

میرے آقاﷺ نے ہر  دعا  میں حق

اپنی   امت    کی    ترجمانی  کی

*** ایم اکرام الحق ***

*** نعت رسول مقبولﷺ ***

دل  سکون  پاتا   ہے   آپﷺ  کی   محبت میں

لب درود پڑھتے ہیں آپﷺ کی ہی مدحت میں

روشنی ہے  پائی  سب  آپﷺ  کی  ہدایت میں

ملتی ہر نصیحت ہے  آپﷺ کی ہی سیرت میں

انبیاء  بھی  افضل  ہیں   اولیاء   کو  بھی  مانا

معتبر ہیں آقاﷺ بس  سب خدا کی خلقت میں

ہم   غلام   آقاﷺ   کے  ہم   مرید   آقاﷺ   کے

زندگی میں  پایا  سب  آپﷺ  کی عقیدت میں

ابتدائے    دنیا      سے     انتہائے     عالم     تک

دل امیر رہتے  ہیں  مصطفیﷺ  کی الفت میں

ناز ہے کہ امت میں  آقاﷺ کی میں  شامل ہوں

قبر  میری  روشن  ہے  آپﷺ کی  شفاعت میں

حق  ہے پائی  امت  نے  دو جہاں کی  ہر راحت

آپ  کی ولایتﷺ میں آپﷺ کی اطاعت میں

*** ایم اکرام الحق ***

*** نعت مبارک ﷺ ***

روشن  سا  اک   چراغ   ہے   اندر جلا دیا

جینا حضور آپﷺ نے مجھ کو سکھا دیا

مالک   نے   اپنی   ذات   کا   پردہ  ہٹا دیا

معراج میں  حضورﷺ کو جلوہ دکھا دیا

عالم ہے  انتساب  کہانی  میں  آپﷺ کی

کونین   کو   رسول ﷺ  کا  گلشن  بنا دیا

مانا کہ کچھ نہیں ہے  عبادت کے باب میں

اک  آسرا  ہے  دل  میں   شفاعت  بسا  دیا

سرکارﷺ  اپنا  جام  محبت  پلا  ہی  دیں

دنیا  کے   ہم   کو  عشق  نے  ازحد رلا دیا

لینے  کو   جب  حساب   فرشتے  نکل  پڑے

کملی میں تب حضورﷺ نے مجھ کو چھپا دیا

رحمت حضور پاکﷺ کی برسی غضب کی حق

اپنے ﷺ  غلام   کا    مجھے   درجہ  دلا  دیا

*** ایم اکرام الحق ***

*** نعت مبارکﷺ ***

ہم   غلاموں   کا   یہی    اعلان  ہے

ہر   محبت   آپﷺ   پر   قربان  ہے

خوش نصیبی  کی  یہی  پہچان  ہے 

آپﷺ کی چوکھٹ کا وہ دربان  ہے

آپ ﷺ  اول   آپ ﷺ    آخر   رہنما

اس   پہ   دل    مستقل    برہان  ہے

ہم  نے   مانا   بزم  دنیا   ہے  حسیں

آپﷺ  پر   کونین  بھی  قربان  ہے

جس نے جانا آپﷺ کو  محبوب تر

اپنی   دنیا    کا    وہی   سلطان  ہے

ہر سو پڑھتا ہوں قصیدے آپﷺ کے

میری  بخشش  کا   یہی  سامان  ہے

دور  دنیا   ہو گئی  جو  آپﷺ  سے

حق   پریشاں   دل   یہ   حیران  ہے

*** ایم اکرام الحق ***