رضا علی عابدی کا تعارف اور شاعری

تعارف

 سوال نمبر ا-آپ کا پورا نام کیا ہے

ج۔ رضا علی عابدی

سوال نمبر2- آپ کا تعلق کہاں سے ہے

ج۔ میرا تعلق مظفرآباد کے ایک مضافاتی گاوں ڈنہ مغلاں سے ہے ۔

سوال نمبر 3- آپ کی تعلیم کیا ہے 

ج۔ میں اردو ادب میں ایم فل کر رہا ہوں 

سوال نمبر4- آپ کو شاعری کا شوق کب ہوا۔ 

شاعری کا شوق تو شعور سنبھالتے ہی ہو گیا تھا 

سوال نمبر 5-شاعری میں آپ کے استاد کون ہیں۔

شاعری میں اصلاح مشتاق علی شان سے لی 

سوال نمبر 6-کون سے شاعر کو پسند کرتے ہیں۔

ج۔ غالب فیض ساحر تنویر سپرا مایا کوفسکی پابلو نرودا ورڈزورتھ

سوال نمبر 7۔اور کیوں پسند کرتے ہیں

ان سب کے ہاں زندگی کا ایک مخصوص نظریہ ملتا ہے یہ سب ترقی پسند شعرا تھے ان کے ہاں انسان زندگی اور سماج ہی اصل موضوعات ہیں ۔ 

سوال نمبر 8-اپنے ہم عصر شعراء میں کون سے شاعر کو پسند کرتے ہیں۔ 

مشتاق علی شان ، عمیر نجمی ، رحمان فارس ، اظہر فراغ ، اسلم رضا 

سوال نمبر 9-شاعری کے علاوہ کسی اور صنف ادب پر قلم اٹھایا

کالم نگاری ، مضمون نویسی ، انشائیے اور افسانہ نگاری 

سوال نمبر 10-اپنا پسندیدہ کلام سنائیے

گلوں میں رنگ بھرے باد نو بہار چلے 

چلے بھی آو کہ گلشن کا کاروبار چلے 

قفس اداس ہے یارو صبا سے کچھ تو کہو 

کہیں تو بحر خدا آج ذکر یار چلے 

( فیض )

سوال نمبر 11-اپنی زندگی کا کوئی دلچسپ واقعہ بیان کریں

زندگی واقعات اور حادثات سے بھری پڑی ہوئی ہے ۔ ہر واقعہ دلچسپ حیرت انگیز اور عبرت ناک بھی ہے ۔ ایسا کوئی مخصوص واقعہ تو نہیں ہے ۔ یا ان کی نوعیت مختلف ہو گی ۔

سوال نمبر 12-کوئی ایسی شخصیت جس سے ملنے کی خواہش ہو

ج۔ جن شخصیات سے مجھے ملنے کی خواہش ہے ان میں سے کوئی بھی زندہ نہیں ہے ۔ اگر زندہ شخصیات میں سے ملنے کی بات کی جائے تو میں شمالی کوریا کے صدر کم جونگ ان سے ملنا پسند کروں گا

سوال نمبر 13۔پاکستان اور ہندوستان کے شعراءمیں کیا چیز مشترک نظر آتی ہے۔ 

دونوں اطراف کے شعرا میں ایک چیز کافی مشترک ہے کہ شاعری خصوصا غزل میں جدید اور بالکل نئے موضوعات پر طبع آزمائی کی جا رہی ہے ۔

سوال نمبر 14۔آپ نے شاعری ہی کا انتخاب کیوں کیا

کیوں کہ 

شاعری مجس ہستی میں ہے روزن کی طرح 

یہ ہنر حبس  میں پاگل نہیں ہونے دیتا 

سوال نمبر 15۔آپ کے خیال میں آپ کی شاعری میں کیا انفرادیت ہے۔ 

یہ بات تو کوئی قاری یا ناقد ہی بتا سکتا ہے مگر میں سمجھتا ہوں کہ میں شعر کو محسوس کرتا ہوں اور جو محسوس ہوتا ہے اسے لکھ ڈالتا ہوں ۔ یہ ایک کیفیت ہوتی ہے

منتخب کلام:

یہ کس فضا کے لوگ ہیں یہ کس قضا کا خوف ہے

نہیں ہے ڈر انھیں ذرا یہاں وبا کا خوف ہے 

نگل رہی ہزار ہا ہزار آدمی یہ روز

یہ بھوک اک بلا ہے اور اسی بلا کا خوف ہے

ارے میاں یہ زندگی ہے مثل اک چراغ کے

چراغ جس کو آج سر پھری ہوا کا خوف ہے 

یہ اس قدر گھٹن میں سب ہیں  جاں بلب اسی لیے

یہاں صدا کا قحط تھا ،یہاں صدا کا خوف ہے

ہے مولوی کا جو خدا  وہ بھی تو اک برانڈ ہے 

طلب رسد اسی کی ہے اسی خدا کا خوف ہے

سسک سسک کے جی رہا ہے زندگی کا واہمہ

یہ لوگ ہیں وہ لوگ جن کو بس سدا کاخوف ہے

 

یہ خوف کی تجارتوں پہ خوف حکمران ہے

رضا علی کو دیکھیے علی رضا کا خوف ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اتنی مہنگی دنیا میں اتنا مہنگا خواب

لمحہ لمحہ کر کے جوڑے قطرہ قطرہ خواب

چھن جانے کا خوف بہت تھا لٹ جانے کا ڈر 

میں نے آنکھ میں میچ لیے تھے ریزہ ریزہ خواب

ایک سمے محسوس کیا تھا میں نے اس کا لمس  

جب کوشش کی چھونے کی تو نکلا چہرہ خواب

ہلکی سی اک  جنبش پر بھی کھل جاتی ہے آنکھ 

 نیند میں ڈرنے لگ جاتا ہے میرا سہما خواب

دیکھ کے مری آنکھوں کو اب ساری دنیا بولے گی

اتنی چھوٹی آنکھیں ہیں اور اتنا اونچا خواب

کسی کسی کو دولت شہرت کسی کسی کو مال  

علی رضا کی قسمت میں ہیں بس کچھ  تنہا خواب

( رضا علی عابدی ).

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

حبا کے جیسی کوئی شاعری سناوں گا 

میں جھیل ڈل پہ یوں پھر سے کنول کھلاوں گا

نئے نئے سے اجالے تراش لاوں گا

بھٹک گئے جو انھیں راستہ دکھاؤں گا

بجھی پڑی ہیں یہ آنکھیں دماغ بنجر ہیں 

سو خواب بو کے سویرے نئے اگاوں گا 

تو شال اوڑھے مرا انتظار کرنا اور

میں برف باری سے پہلے ہی لوٹ آوں گا

میں تھک گیا بھی اگر تو چلوں گا سر کے بل

رکوں گا پھر بھی نہیں ، راستے تھکاوں گا

لرز اٹھیں گے دل اشقیا یہ سنتے ہی

میں نعرہ حیدری حر کی طرح لگاوں گا

سہم رہے ہیں ابھی بھی جو شب کی ظلمت سے

افق پہ جا کا انہیں روشنی دکھاؤں گا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اپنی آنکھوں ﮐﮯ ﺧﻮﺍﺏ ﺑﯿﭽﮯ ﮨﯿﮟ،

ﺧﻮﺍﺏ ﮐﯿﺎ ﺗﮭﮯ، ﺳﺮﺍﺏ ﺑﯿﭽﮯ ﮨﯿﮟ،

ﺑﮭﻮﮎ ﺍﻭﺭ ﮐﺮﺏ ﻣﻔﻠﺴﯽ، ﻭﺣﺸﺖ !

ﮨﻢ ﻧﮯ ﺳﺎﺭﮮ ﻋﺬﺍﺏ ﺑﯿﭽﮯ ﮨﯿﮟ،

ﺳﺐ ﻣﺴﺎﺋﻞ ﺷﮑﻢ ﮐﮯ ﺑﮭﺎﺭﯼ ﺗﮭﮯ،

ﻭﺻﻒ ﺳﺎﺭﮮ ﺟﻨﺎﺏ ﺑﯿﭽﮯ ﮨﯿﮟ،

ﺟﺎ ﺑﺠﺎ ﮨﻮ ﺭﮨﯽ ﯾﮯ ﻧﯿﻼﻣﯽ،

ﻣﻔﻠﺴﯽ ﻧﮯ ﺷﺒﺎﺏ ﺑﯿﭽﮯ ﮨﯿﮟ،

ﺯﻧﺪﮔﯽ ﮐﮯ ﺳﻮﺍﻝ ﭘﺮ ﮨﻢ ﻧﮯ،

ﺷﺎﻋﺮﯼ ﮐﮯ ﺟﻮﺍﺏ ﺑﯿﭽﮯ ﮨﯿﮟ،

ﺁﮦ ﮐﻠﯿﻮﮞ ﮐﯽ ﺁﺭﺯﻭ ﯾﻌﻨﯽ !

ﻋﺎﺑﺪﯼ ﺳﺐ ﮔﻼﺏ ﺑﯿﭽﮯ ﮨﯿﮟ،

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

روک لینے سے بھلا رک بھی کہاں سکتی ہے 

روشنی بند کواڑوں سے نکل آتی ہے 

روز میں جھاڑ کے کمرے کو چلا آتا ہوں

روز وحشت بھی درازوں سے نکل آتی ہے

زندگی سونپ کے رکھتا ہوں میں الماری میں 

موت درذیدہ  اجاڑوں سے نکل آتی ہے

یار دیوار میں چنتا ہوں میں اس کو پھر بھی!

یاد بوسیدہ دراڑوں سے نکل آتی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کتنی باتوں کی حسرت کہی ان کہی 

بات کرنا بھی چاہوں مگر ، بے بسی 

چل مجھے لے کے چل اس جہاں سے پرے

آج کہنے لگی مجھ سے آوارگی

مرے وہم و گماں پہ ہے وارد ہوئی 

آگ سی مجھ میں جلنے لگی آگہی 

تیرے قدموں کی آہٹ سنائی نہ دے

شور کرنا نہیں سو رہی روشنی 

کتنی مدت سے چپ ہے برس ہا برس

موت جیسی ہی لگتی ہے یہ زندگی

ایک مدت تلک میں بھی سویا نہیں

ایک مدت سے چھائی ہوئی بے کلی

دوستا یہ عداوت یہیں ختم کر

تجھ کو مہنگی پڑے نہ کہیں دشمنی

مجھکو اندر ہی اندر سے کھائے گی یہ 

ایک دیمک کے جیسے لگی آ گہی

جیسے زنداں میں رہنا ہو عمر بھر 

زندگی ہے یا قیدی کی بے بسی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کبھی تو وحشت سے دل لگایا

کبھی جنوں سے بھی بن پڑی تھی

ہرے درختوں کو کھا گئی ہے

یہ بیل برگد پہ جب چڑھی تھی

میں خود مقابل تھا آپ اپنے

بہت ہی مشکل کی یہ گھڑی تھی

اسے جنوں نے پھر آن گھیرا 

وہ پھر سے سوتے میں چل پڑی تھی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رات کی تاریکیوں سے خوف کا ہو گا جنم 

پھر دیے کی روشنی بھی پھڑپھڑاتی جائے گی

 

یہ وبا پھیلی ہے ایسے شہر کے ماحول میں 

کہ گلوں کی تازگی بھی کسمساتی جائے گی

 

آسماں کی کوکھ میں پلنے لگی ہے روشنی 

ہاتھ تھامے کہکشاں کا مسکراتی جائے گی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ عجب سانحہ نہیں ہے کہ   میں 

خود ہی اپنی خوشی کا دشمن ہوں 

لوگ  مرتے  ہیں   زندہ  رہنے   پر

اور  میں  زندگی   کا  دشمن  ہوں

میں  فقط  روشنی  کا  قائل  ہوں 

رات  کی  تیرگی  کا  دشمن  ہوں  

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اپنی اپنی فریم میں ہم لوگ

زندگی تو گزار دیتے ہیں 

سانس لینا ہی حاصل کل ہے 

خود کو اندر سے مار دیتے ہیں 

بس جسموں کا بوجھ ڈھوتے ہیں 

روح ایسے ہی ہار دیتے ہیں 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خود ہی لکھوں اور لکھ کر میں پھینک بھی دوں

ایک کہانی جس کا کوئی انجام نہ ہو 

میرے مولا کس کے نام وہ درد لکھوں 

جس میں چہرہ کھو جائے اور نام نہ ہو 

دن تو جیسے تیسے کر کے کٹ جاتا ہے 

دل کے سونے آنگن میں کوئی شام نہ ہو

جی یہ چاہے خود کو میں مصروف رکھوں

فرصت ایسی کرنے کو کوئی کام نہ ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں جو  چاہوں تو ابھی حشر  اٹھا سکتا ہوں 

قصر شاہی کے در و بام گرا  سکتا  ہوں

شہر کا  شہر مخالف ہے تو کیا غم ہے

میں ترازو کو تیرے حق میں جھکا سکتا ہوں

میری طاقت کا تو ادراک نہیں  رکھتا ہے

ظلمت شب کے سبھی نقش مٹا سکتا ہوں

تیرے جانے کا الم مجھ پہ گراں گزرا تھا 

بعد اس کے میں کوئی غم بھی اٹھا سکتا ہوں 

شب تاریک اجالے کو تو آواز تو دے

کتنے سورج تری راتوں میں جلا سکتا ہوں 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہم ایسے لوگ مقید ہوئے ہیں کمروں میں،  

کہ سانس لینا جہاں پر محال ہوتا ہے

سمجھ گیا رائیگانی سوا نہیں کچھ بھی

میاں یہ عشق تو جاں کا وبال ہوتا ہے 

یہ اصول فطرت ہے میاں سو جھک کے چل 

کہ ہر عروج کو اکثر زوال ہوتا ہے 

تجھے یہ دکھ ہے کہ میں بھی نہیں ہوں پاس تیرے 

یقین جان مجھے بھی ملال ہوتا ہے

 

نہیں سوال اگر رات کی تاریکی پر 

تو روشنی پہ ہی کیوں اکثر سوال ہوتا ہے 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مانا، تھا اِس قید سے چھٹکارا مشکل

خود کو سانس کی قید سے بھی  آزاد کیا

 

تنہائی کو کم کرنے کے چکر میں

دکھ ، الم اور وحشت کو ایجاد کیا

رفتہ ، رفتہ،  چپکے، چپکے بالآخر 

اپنی ذات کو خود میں نے  برباد کیا

 

میرے حصے میں جو آئی تاریکی

اس سے مل کر میں نے جگ آباد کیا 

سب چہروں کے نقش گنوا کے بیٹھا ہوں  

ہاں پر تیرا چہرہ میں نے یاد کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

اب مجھے رختِ سفر باندھ کے رکھنا ہو گا

عین ممکن ہے ترے دل سے نکالا جائے

ہجر کا کرب مری جان نگل جاتا ہے

بس کسی طرح سے اس رات کو ٹالا جائے

میرے احباب ہی اکثر مرے دشمن نکلے 

اب کسی طور کوئی سانپ نہ پالا جائے۔

 

۔۔۔۔۔۔۔۔۔۔۔۔۔۔

میں خیالوں میں ترا عکس بنا کے اکثر 

کئی باتیں تو تجھے یوں ہی سنا آتا ہوں

۔۔۔۔۔۔۔۔۔۔۔۔۔۔۔۔۔۔۔۔۔

رضا یہ بات جو دل کو سکون دیتی ہے

کہ رات جیسی ہو اس کی سحر بھی ہوتی ہے

۔۔۔۔۔۔۔۔۔۔۔۔

تمہارے جانے کے بعد گرچے گلوں کی رنگت  تو کھل رہی تھی  

مگر وہ خوشبو جو تیرے ہونے سے ہو رہی تھی، وہ جا چکی ہے 

۔۔۔۔۔۔۔۔۔۔۔۔۔

ان سے بڑھ کر بھی بھلا ہو گا کوئی قابل رحم 

نیند ہاتھوں میں لیے ، خواب کے مارے ہوئے لوگ

خوف آنکھوں میں ، نہ چہرے پہ زیاں کا دکھ ہے

ایسے ہوتے ہیں بھلا جیت کے ہارے ہوئے لوگ

۔۔۔۔۔۔۔۔۔۔۔۔۔

اب تو ہر رنگ میں بس تو ہی تو نظر آتا ہے 

میں نے منصور کی آنکھوں سے تجھے دیکھا ہے 

۔۔۔۔۔۔۔۔۔۔۔۔۔۔۔۔۔۔

اندھیری شب سے سحر کا ظہور ہوتا ہے 

کہ شعر ہوتا ہے ، جہاں پہ شعور ہوتا ہے 

۔۔۔۔۔۔۔۔۔

رات کی تاریکیوں سے خوف کا ہو گا جنم 

پھر دیے کی روشنی بھی پھڑپھڑاتی جائے گی

 

یہ وبا پھیلی ہے ایسے شہر کے ماحول میں 

کہ گلوں کی تازگی بھی کسمساتی جائے گی

  

آسماں کی کوکھ میں پلنے لگی ہے روشنی 

ہاتھ تھامے کہکشاں کا مسکراتی جائے گی 

۔۔۔۔۔۔۔۔۔۔۔۔۔۔

کچھ لمحوں میں مرتا کچھ میں جیتا ہوں

تھک جاوں  تو بس میں  ، چائے پیتا ہوں

میں سمجھا تھا  دائم نام رہے گا میرا

میں صدیوں میں رہنے والا ،پل میں بیتا ہوں

۔۔۔۔۔۔۔۔۔۔۔۔۔۔۔

کل شب تاریکیوں نے کیا رقص ہنس کر 

اہل ستم نے جب بھی کی تقریب روشنی

تم کھل کے کرو کام اور پھیلاو روشنی

اہل جفا کا کام ہے تخریب روشنی 

۔۔ے۔۔۔۔۔۔۔۔۔۔۔

اس خواب کی ازیت تم کو خبر کہاں؟ 

ٹوٹے جو بن کہ کرچی آنکھوں کے درمیاں

۔۔۔۔۔۔۔۔

پھر یوں ہوا کہ جسم کی اپنی نمود پر 

اپنا شعور خام بھی آگے نہ بڑھ سکا 

۔۔۔۔۔۔۔۔

ﺍﺏ ﻣﺠﮭﮯ ﺧﻮﺍﺏ ﮐﯽ ﺩﺳﺘﮏ ﺑﮭﯽ ﻧﮩﯿﮟ ﮨﻮﺗﯽ ﮨﮯ

ﺍﺱ ﻗﺪﺭ ﺳﮩﻢ ﮔﯿﺎ ﺭﺍﺕ ﮐﯽ ﺗﻨﮩﺎﺋﯽ ﺳﮯ

۔۔۔۔۔۔۔۔

ہم نے اب رکنا نہیں ہے منزلوں پہ جائیں گے

سرخ پرچم کو اٹھا کے آگے بڑھتے جائیں گے

جب نوید صبح کا روشن ستارہ کھل اٹھے 

ظلمتوں کے سب نشاں خود ہی مٹتے جائیں گے

۔۔۔۔۔۔۔۔۔۔۔۔۔

میں نے خود سے بھی دور وحشت میں 

جب بھی رکھا تو____ فاصلہ رکھا

۔۔۔۔۔۔۔۔۔۔۔۔ 

اب کے برس تو قحط کچھ اس قدر بھی تھا 

 پچھلے برس کے خواب گملوں میں جل گئے

۔۔۔۔۔۔۔

نہیں نہیں چلو ابھی یہاں وبا کا خوف ہے 

کہ جان بچ گئی اگر یہ عشق اگلے سال پھر