سیدہ جعفر:کثیر الجہات شخصیت:اک مطالعہ
اردو زبان و ادب کے فروغ میں حیدرا ٓباد دکن کا اہم حصہ رہا ہے۔یہ شہر ہمیشہ سے ہی علم وادب کا گہوارہ رہا ہے۔حیدرآباد کا ادبی گہوارہ جامعہ عثمانیہ کی علمی خدمات اور اس کی سر گرمیاں کسی سے پوشیدہ نہیں،اسی علمی ادارہ سے پروفیسر سیدہ جعفر وابستہ تھیں۔سیدہ جعفر ایک ایسی خاتون تھیں جو ادب میں اپنی علمی،ادبی،تحقیقی،تنقیدی،اور تدریسی کاموں کی وجہ سے الگ شناخت رکھتی تھی۔اگر ہم ان کی زندگی پر نظر ڈالیں تو دیکھتے ہیں کہ آپ کی والدہ کا نام صغری ٰبیگم تھا، ان کے والد کا نام سید جعفر علی تھا۔آپ کے شوہر سید احمد مہدی جو ایڈوکیٹ تھے اور جو حیدرا ٓباد میں سیول سائٹ پر پراکٹس کرتے تھے۔ان کے شوہر ہاشم نواز جنگ کے نواسے اور عالم یار جنگ کے بھانجے تھے۔سیدہ جعفر کے دو بیٹے ہیں جن میں بڑے بیٹے ڈاکٹر نوازش مہدی میکانیکل انجینیئر نگ کے پروفیسر ہیں اور مفخم جاہ انجینیئرنگ کالج میں پڑھاتے ہیں۔چھوٹے بیٹے کیپٹن سید حسین مہدی پائلٹ ہیں اور دکن ایران ایر لائنس میں اپنی خدمات انجام دے رہے ہیں۔ سیدہ جعفر کے دادا سید سجاد علی کے چھوٹے بھائی نواب مہدی نواز جنگ،سابق گورنر گجرات تھے۔سیدہ جعفر ایکچ اعلیٰ خاندان سے تعلق رکھتی تھی۔سیدہ جعفر کے جد اعلٰی سید رضی تھے،جنھوں نے ایک اعلیٰ کارنامہ یہ انجام دیا کہ حضرت علیؓ کے خطبات کا مجموعہ ”نہج البلاغہ“کے عنوان سے مرتب کیا تھا۔اور ان کے بھائی سید مرتضےٰ ؒ ”اعلام الہدی ٰ“ کہلاتے تھے۔یہ دونوں اسلام کے عظیم الشان چوٹی کے علما ء میں شمار کیے جاتے تھے ایک اور اہم نام سید محمد والہ موسوی جو سیدہ جعفر کے جد اعلیٰ میں تھے۔اس کے علاوہ سیدہ جعفر کے خاندان میں کئی شاعر و ادیب بھی گزرے۔دکن کے ممتاز محقق حکیم شمس اللہ قادری نے سید محمد والہ کی سوانح لکھی جو مثنوی ”طالب و موہنی“ کے خالق تھے۔مثنوی طالب و موہنی کو ڈاکٹر محی الدین قادری زور نے اپنے مقدمہ کے ساتھ 1957ء میں شائع کیا تھا۔اس کے علاوہ محمد تقی ہمدم نے بھی ”لمعات شمس“میں والہ کے خاندان حالات تفصیل سے قلمبند کئے ہیں۔ سیدہ جعفر کو بھی اپنے خاندان پر بہت ناز تھا فرماتی ہیں۔”مجھے ہمیشہ اس بات پر فخر رہے گا کہ میرے جد اعلیٰ سید رضی ؒ تھے …..ہمارا تعلق ایران کے صفوی گھرانے سے ہے اس لیے ہم لوگ موسوی الصفوی کہلاتے ہیں۔ساتویں قطب شاہی فرماں روا عبداللہ قطب شاہ کی تین بیٹیوں میں سے ایک بیٹی ہمارے جد سے بیاہی گئی تھی اس طرح دو بڑے خاندانوں سے ہمارا تعلق ہے۔“ (اپریل 2013ارددنیا)
انٹر میڈیٹ اور بی اے کی تعلیم سیدہ جعفر نے جامعہ عثمانیہ سے امتیازی نمبروں سے پاس کیا ۔ان کے مضامین میں Economicsاور Socialogyبھی تھے۔سیدہ جعفر نے پروفیسر عبدالقادر سروری کی زیر نگرانی ”اردو مضمون کا ارتقا ء“ کے موضوع پر مقالہ لکھ کر 1959ء میں جامعہ عثمانیہ سے پی۔ایچ۔ڈی کی ڈگری حاصل کی۔1965میں شعبہ ئ اردو جامعہ عثمانیہ میں بحیثیت ریڈر مقرر ہوئیں۔1983 میں پروفیسر اور 1984سے 1986تک صدر شعبہ ئ اردو کے عہدے پر فائز رہیں۔فروری 1991میں سیدہ جعفر بحیثیت پروفیسر اردو حیدرا ٓباد سنٹرل یونیورسٹی منتقل ہوئیں۔وہاں انھیں 1994میں وظیفہ پر سبکدوش ہونے کے بعد مزید دو سال کی توسیع دی گئی۔ادبی تحقیق و جستجو نے انھیں پاکستان،ایران اور لندن جیسے ممالک تک پہنچایا۔ان ملکوں سے انہوں نے علمی استفادہ کیا۔
پروفیسر سیدہ جعفر ایک کثیر التصانیف ادیبہ تھی،ان کا طرز نگارش عالمانہ،مفکرانہ،اور سنجیدہ ہوتا تھا۔اردو کے ساتھ ساتھ انگریزی زبان پر بھی ان کی گرفت بہت مظبوط تھی۔ان کی اب تک 32کتابیں شائع ہوکر علمی و ادبی حلقوں میں پذیرائی حاصل کر چکی ہیں۔ان میں بہت سی کتابیں ایسی بھی ہیں جن کے دیگر زبانوں میں مثلا انگریزی،عربی،مراٹھی اور میتھلی زبان میں تراجم ہو چکے ہیں۔وہ دکنیات کے علاوہ رثائی ادب پر بھی گہری نظر رکھتی ہیں۔انہوں نے رثائی ادب کو فن کی کسوٹی پر پرکھا،معروف نقاد پروفیسر شارب ردولوی نے اپنے تبصرے میں اس طرح لکھتے ہیں ”ڈاکٹر سیدہ جعفر نے اپنے کو صرف قدیم ادب یا دکنیات تک محدود نہیں رکھاہے ……….لیکن جدید ادب پر بھی ان کی دسترس اسی طرح ہے جس طرح دکنیات پر۔انھوں نے ادب کے افق پر ہونے والی تبدیلیوں کا بہت غور سے مطالعہ کیا ہے۔“
ڈاکٹر زور کے کہنے پر سیدہ جعفر نے شاہ تراب چشتی کی مثنوی ”من سمجھاون“ پر کام کیا اور ثابت کیا کہ یہ مراٹھی کے شاعر رام داس کی کتاب ”شری مناچے شلوک“ سے متاثر ہو کر لکھی گئی۔دکنیات میں یہ ان کی پہلی تحقیقی تصنیف تھی،اس کے دیباچے میں پروفیسر مسعود حسین خاں نے لکھا۔”میں شعبہئ اردو جامعہ عثمانیہ کی جانب سے ایک ادبی تحفہ اور علمی چیلنج پیش کرتا ہوں۔“ مزید یہ کہ ”سیدہ جعفر نے مرحوم عبد الحق،وحیدالدین سلیم اور ڈاکٹر زور کی روایات کا بھرم رکھا ہے۔“سیدہ جعفر کے اس تحقیقی مقالے کا ہندی،مراٹھی،اور عربی میں ترجمہ ہو چکاہے۔ اسی اہم کام بعد ہی سیدہ جعفر کو دکنی ادب سے خاص دلچسپی پیدا ہوئی فرماتی ہیں،”دراصل مجھے تحقیق سے زیادہ تنقید کا میدان پسند تھا اور دکنیات کے سلسلے میں کام کرنے کا میرا کوئی ارادہ نہیں تھا،ایک دن ڈاکٹر زور نے شاہ تراب چشتی کی مثنوی ”من سمجھاون“کا نسخہ مجھے دیا اور کہاکہ یہ نسخہ عنایت جنگ بہادر نے بھیجا ہے اور میں چاہتا ہوں کہ تم اس پر کام کرو۔تو یوں سمجھیے کہ بس اتفاقی طور پر میں نے دکنی پر کام کر لیا اور میں نے اس کتاب میں ثابت کیا کہ مراٹھی کے شاعر رام داس کی کتاب ”شری مناچے شلوک“سے متاثر ہوکر جنوبی ہند کے شاعر شاہ تراب چشتی نے ”من سمجھاون“ لکھی۔اس کے بعد مجھے دکنی تحقیق کا شوق پیدا ہوا۔“ (اپریل 2013اردو دنیا)۔محققین میں سیدہ جعفر ڈاکٹر محی الدین قادری زور،پروفیسر مسعود حسین خاں،احتشام حسین اور آل احمد سرور سے متاثر تھی۔
سیدہ جعفر کی پہلی کتاب ”ماسٹر رام چندر اور اردو نثر کے ارتقا میں ان کا حصہ“تھی۔دکنیات میں ان کی کتابیں من سمجھاون،دکنی رباعیاں،سکھ انجن،دکنی نثر کا انتخاب،مثنوی یوسف زلیخا،چندر بدن و مہیار،کلیات محمد قلی قطب شاہ،مثنوی ماہ پیکر،جنت سنگار،دکنی ادب میں قصیدے کی روایت،مثنوی گلدستہ اور نوسرہار،دکنی لغت قابل ذکر ہیں۔اس کے علاوہ دکنیات میں اہم کارنامہ سیدہ جعفر کا یہ کہ انھوں نے محمد قلی کی بارہ غزلوں کو اردو دنیا سے متعارف کرایا۔یہ نادرو نایاب غزلیں انھوں نے لندن میں وہاں کے ایک نوادرات کے تاجر سے حاصل کی تھی۔دکنی لغت میں سیدہ جعفر نے ساڈھے تیرہ ہزار اندراجات کے علاوہ ہر لفظ کی جنس (تذکیر و تانیث) واحد جمع ، ماخذ اور محل استعمال کی نشاندہی کی ہے۔انہوں نے دکنی تحقیق سے ہٹ کر تنقید،ترجمہ،لغت نویسی اور ادبی تاریخ میں کارہائے نمایاں انجام دیئے۔ترجمے میں ہر دیا کماری کی تصنیف ”ویلا تھال“ کا اردومیں کامیابی سے تر جمہ کیا جو ساہتیہ اکیڈمی سے 1990میں شائع ہوئی۔ساہتیہ اکیڈمی کی جانب سے سیدہ جعفرکی تین تصانیف اردو ادب کے معمارسلسلے کی ”ڈاکٹر زور“،مخدوم محی الدین،اور فراق گو رکھپوری،شائع ہوئیں،جو انتہائی اہمیت کی حامل ہیں۔ان کی تنقیدی کتابیں،تنقید اور انداز نظر،مہک اور محک،
فن کی جانچ اور تفہیم و تجزیہ اردو ادب کے سرمایہ میں قابل قدر اضافہ ہیں۔ان کی تنقیدی کتابیں،تنقید اورانداز نظر،مہک اور محک،فن کی جانچ اور تہیم و تجزیہ اردو ادب کے سرمایہ میں قابل قدر اضافہ ہیں۔”فن کی جانچ“ کے پیش لفظ میں پروفیسر سید احتشام حسین فرماتے ہیں۔”سیدہ جعفر کو دو حیثیتوں سے خصوصیت حاصل ہے۔اول یہ کہ ان کی ذہنی صلاحیتیں تحقیق اور تنقید دونوں میدانوں میں سر گرم کار ہیں اور دوسرے یہ کہ ان کی رفتار نگارش میں ہمواری اور توازن ہیں“۔
اسی طرح اپنے خیالات کا اظہار کرتے ہوئے پروفیسر گیان چند جین ”اردو مضمون کا ارتقا ء“ کے بارے میں اپنے مضمون ”سیدہ جعفر بہ حیثیت محقق“ میں اس طرح لکھتے ہیں۔”اس مقالے کا حصار بہت بڑا ہے۔اس میں سماجی،اصلاحی،تاریخی،سیاسی،رومانی،مذہبی،فلسفیانہ،مزاحیہ،تنقیدی،اور تحقیق سبھی قسموں کے مضامین کا جائزہ لیا گیا ہے۔“ (بحوالہ: پرکھ اور پہچان،ص 357،1990ء دہلی)
قومی کونسل کی جانب سے سیدہ جعفر نے گیان چند جین کے اشتراک سے ”تاریخ ادب اردو 1700ء تک“ پانچ جلدوں میں لکھی۔گیان چند جین اسی مضمون میں لکھتے ہیں۔”مجھے اور انہیں مشترکہ طور پر یہ زمہ داری دی گئی۔ میں نے ابواب کا خاکہ بناکر آدھا کام اپنے پاس رکھا،آدھا سیدہ جعفر کے ذمہ کردیا۔انہوں نے یہ کام اپنے پاس رکھا،آدھا سیدہ جعفر کے ذمہ کردیا۔انھوں نے یہ کام اتنی شرح و بسط سے کیا کہ میں بالکل دب کر رہ گیا۔میں نے اپنے حصے کو چار سو صفحوں میں پورا کر دیا،سیدہ جعفر نے 1700صفحات گھسیٹ دیئے اور کمال کی بات ہے کہ کچھ بھی غیر متعلق نہیں۔“ اس کے علاوہ سیدہ جعفر نے ”تاریخ ادب اردو“ (عہد میر سے ترقی پسند تحریک تک) چار جلدوں میں لکھی جو ”بے منت غیر“ 2002ء میں شائع ہوئیں۔”تاریخ ادب اردو“ سیدہ جعفر کا ایسا کارنامہ ثابت ہوا جس کی ادبی حلقوں میں خوب پذیرائی ہوئی۔ان کے اس کام کی ستائش گوپی چند نارنگ نے اہم کارنامہ کہا جب کہ شمس الرحمن فاروقی نے گرا نقد اور عظیم الشان بنا کر کی ہے۔سیدہ جعفر کی ان اہم تصانیف کے علاوہ بے شمار پر مغز نثر پارے،مضامین،انشائیے،اور خاکے مختلف رسائل،جرائد،اور مختلف اخبارات میں شائع ہو کر منظر عام پر آئے ہیں۔پروفیسر اشرف رفیع نے مجلہ عثمانیہ 2004ء اس طرح اظہار خیال کیا ہے۔”سیدہ جعفر کی تحقیقی کاوشیں،تاریخی تہذیبی اور ادبی شعور کی ترجمان ہیں۔انہوں نے دکنی ادب پاروں کی اشاعت سے دکنی ادب کے سرمایہ میں نہ صرف گرانقد اضافہ کیا ہے بلکہ گولکنڈہ اور بیجا پور کی تہذیب و ثقافت کو از سر نو زندہ کر دیا ہے۔“ پروفیسر سیدہ جعفر کی نگرانی میں 9 اسکالرز نے پی۔ ایچ۔ ڈی اور 11 اسکالرز نے ایم فل کی ڈگری حاصل کی۔ان کے شاگردوں میں ڈاکٹر افضل الدین اقبال،ڈاکٹر لئیق صلاح،ڈاکٹر سلمیٰ بلگرامی،ڈاکڑ مہر جہاں،ڈاکٹر سعیدہ بیگم،ڈاکٹر شاہانہ امیر،ڈاکٹر کوکب النساء اور ڈاکٹر عابد النساء،وغیرہ کے نام خصو صیت سے قابل ذکر ہیں۔ڈاکٹر شفیق النساء روبینہ نے سیدہ جعفر کی حیات و ادبی خدمات پر مقالہ لکھ کر گلبرگہ یونیورسٹی سے پی۔ایچ۔ڈی کی ڈگری لی اور ڈاکٹر امیر علی نے سیدہ جعفر کی شخصیت اور کارنامہ پر مقالہ لکھ کر جامعہ عثمانیہ سے پی۔ایچ۔ڈی کی ڈگری حاصل کی ہیں۔
